Verantwortungsvolle Konsum

Verantwortungsvolle Konsum betrëfft sëllege Beräicher, ënnert anerem den ökologeschen Impakt vum Konsum, awer och seng sozial, ekonomesch oder och gesondheetlech Auswierkungen. Ee verantwortungsvolle Konsum ze hu bedeit dofir "ee Konsum un den Dag ze leeën, deen ëmweltfrëndlech, awer och sozial a wirtschaftlech gerecht ass ".

D'Direktioun fir Konsumenteschutz dréit mat dozou bäi, en adequate Kader auszeschaffen, deen verantwortungsvolle Konsum méi einfach mécht.

Als politeschen Acteur agéiert hien um Niveau vun der Gouvernance a konzentréiert sech drop, ee Konsument ze begleeden, dee vill verschidde Facetten huet an amgaang ass, en neie Liewensstil ze entwéckelen, bei deem e verantwortungsvolle Konsum de selbstverständleche Choix ass.

Am Sënn vun de Konsumente wäert d'Direktioun verschidden Aktiounen entaméieren :

• Zesummenaarbecht mat ëffentlechen a privaten Organisatiounen, déi am Kontext vum verantwortungsvolle Konsum aktiv sinn
• Ënnerstëtzung vu Projeten, déi zur Informatioun a Sensibiliséierung vun engem verantwortungsvolle Verbrauch bäidroen
• Mise en Place vun Instrumenter zur Sensibiliséierung vu verantwortungsvollem Verbrauch
• Déi juristesch Situatioun kloerstelle wat d’Garantie fir reparéiert Géigestänn an d’Responsabilitéit vum Reparateur ugeet
• Innovativ national Projeten am Beräich vun der Reparatur ënnerstëtzen
• D’Reparaturberuffer fërderen
• Projete fir eng méi verantwortungsvoll Moud ënnerstëtzen

De Konsument informéieren

D'Direktioun fir Konsumenteschutz huet sech zum Zil gesat, de Konsumenten déi Informatiounen zur Verfügung ze stellen, déi si brauche fir kënnen e gutt informéierte Choix ze treffen.

Si versicht méi Transparenz an dëse Beräich ze bréngen, wou d‘Ofhängegkeeten tëschent déifgräifend an net net ëmmer op den éischte Bléck ze erkenne sinn.

D’Konsumenten treffen hir eegen Entscheedungen. D'Direktioun fir Konsumenteschutz wëll hinnen d’Mëttel an d’Hand ginn, dass hinnen d’Komplexitéit vun hire Konsumedécisiounen an d’Konsequenzen bewosst sinn.

Rechner fir den CO2-Foussofdrock

D'Direktioun fir Konsumenteschutz huet ee Rechner fir den individuellen CO2-Foussofdrock entwéckelt. Mat dësem Instrument kann de Konsument den Impakt vu sengem Konsumverhalen op d’Ëmwelt rechnen. Dëst erlabt et de Bierger méi bewosst Konsum-Entscheedunge ze huelen fir d’Zukunft vun eisem Planéit.

Prett fir d'Features vum Site z'entdecken an Ären eegenen CO2-Foussofdrock ze berechnen? Mir ginn Iech Rendezvous op myimpact.lu!

Escape Room

Mir schaffen aktuell och un engem Escape Room an deem de verantwortungsvolle Konsum am Mëttelpunkt steet an deen sech virun allem u nee jonke Public wäert wenden. Duerch eng innovativ a spilleresch Approche wäerten hei kënnen Wäerter op eng interaktiv Manéier vermëttelt ginn. Mir sinn der Iwwerzeegung, dass d’Bildung de Schlëssel ass fir dat zukünftegt Konsum-Verhalen ze transforméieren an zu enger méi ëmweltfrëndlecher Gesellschaft.

Reparatur-Bonus

Enn Mäerz 2023 huet d’Europäesch Kommissioun eng Propositioun fir eng Direktive verëffentlecht, déi d’Reparatur vu Produkter fërdert a gläichzäiteg d’Regierungen an d’Betriber dozou motivéiere soll, Reparaturoptioune fir elektronesch Apparater unzebidden. Fir de Konsument wier d’Aféiere vun engem Reparaturbonus, den d’Reparatur vun den Apparater fërdert amplaz se ewech ze geheien, sonner Zweiwel ee wichteg Schrëtt an der Lutte géint d’Verbreedung vun Elektroschrott.

Den Ament bidde verschidde Lëtzebuerger Gemengen hiren Awunner schonn sou ee Bonus un (z. Bsp. fir Haushaltsapparater). Parallel dozou iwwerpréift d’Regierung d’Machbarkeet fir sou ee Reparaturbonus op nationalem Niveau ëmzesetzen.

Repair-Cafés

D'Direktioun fir Konsumenteschutz wëll och d’Ausbreedung vu Repair-Cafés op lokalem Niveau no vir bréngen, fir de Bierger d’Méiglechkeete vun der Reparatur an den Austausch vu Kompetenzen unzebidden an d’Léieren an d’Zesummeschaffen am Beräich vun der Reparatur ze fërderen. Mir wëllen eng Kultur vum Opwäerte vun de Géigestänn, an deem mir d’Kreeslafwirtschaft an eiser Gesellschaft promouvéieren.

Nohaltegen Ernärungssystem

An der Kommunikatioun vun der Europäescher Kommissioun „Farm to Fork – vum Bauerenhaff op den Teller“ ginn d’Zesummenhäng tëschent dem Mënsch, der Gesellschaft an enger gesonder Natur ënnerstrach. Si gesäit e ganze Katalog u Mesurë fir déi ganz Liewensmëttelkette fir, fir op déi Manéier méi een nohaltegen Ernärungssystem opzebauen.

Sozial an ekonomesch Consideratiounen, d‘Stäerkung vun der Positioun vun de Baueren an der Chaîne de valeur, een neit Besënnen op den Déiereschutz, de Schutz vun der Biodiversitéit an d’Auswierkunge vun der COVID-19-Pandemie genau wéi de Krich an der Ukraine hu gewisen, wéi wichteg resilient Liwwerkette sinn.

Dowéinst gouf ee Gesetzesprojet fir d’Ëmsetzung an d’Koordinatioun vun der Liewensmëttelpolitik ausgeschafft. Et geet drëms, eng Koherenz tëschent deene verschiddenen nationale Politiken a Strategien am Beräich Ernärung ze schafen zugonschte vun de Verbraucher, de Produzenten an de Veraarbechter.