Autofestival: Wat een iwwer Kontrakter sollt wëssen

Den Autofestival zitt all Joer vill Konsumenten un, déi no de leschten Autosmodeller a gudden Offere sichen. Verschidde Kontrakter ginn tëscht dem Professionellen an dem a Konsument ofgeschloss, sou wéi Kafs-, Kredit- a Leasingskontrakter. Dësen Dossier erënnert un déi verschidde Reegelen, déi an dësem Kontext gëllen, besonnesch Punkto d’Widderufsrecht an d’Verpflichtung vum Händler fir kloer a verständlech Informatioun ze liwweren éier ee Kontrakt ënnerschriwwe gëtt.

Verkafskontrakter

Allgemeng gëtt de Leit, déi een Auto kafe wëllen, recommandéiert fir d'Bedingunge vum Verkafskontrakt suergfälteg ze liesen, éier si de Kontrakt ënnerschreiwen. Hei gëllt et ënnert anerem follgend Punkten ze berücksichtegen :

• Liwwerdatum : De Liwwerdatum muss am Kontrakt präziséiert sinn. Falls d'Liwwerzäit relativ laang ass, soll een op eventuell Indexatiouns-Klauselen oppassen, déi eventuell ee méi een héije Kafpräis, respektiv méi een niddrege Verkafspräis vu sengem Occasiouns-Auto mat sech brénge kënnen. Dofir soll een net zécken, fir de Professionellen no Explikatiounen ze froen oder fir esou Klauselen ëmzeänneren, falls se net sollte passen
• Am Fall vun engem Prêt : Wann de Kaf vum Auto mat engem Prêt soll finanzéiert ginn, sou gëtt geroden eng Clause suspensive am Kontrakt virzegesinn. Sou ass garantéiert, dass ee vum Kaf vum Auto kann oftrieden, falls de Prêt net accordéiert gëtt.

Et muss een en Ënnerscheed maachen tëscht engem Kontrakt deen am Geschäftsraum vum Händler ofgeschloss gëtt an engem Kontrakt deen op Distanz, also ausserhalb vum Geschäftsraum, ofgeschloss gëtt:

• De Konsument, deen e Verkafskontrakt ausserhalb vun engem Geschäftsraum ofschléisst, huet ee Widderufsrecht vu 14 Deeg (ouni dofir mussen ee Grond unzeginn);
• Dëst Recht gëllt net wann de Kontrakt am Geschäftsraum ofgeschloss ass. Allerdéngs ass et méiglech datt de Verkeefer e kontraktuellt Widderufsrecht gëtt. An dësem Fall muss dësen Accord kloer um Bestellformular stoen. Dës Optioun stellt keng Obligatioun fir den Händler duer.

Et sief och drun erënnert, dass wann de Keefer eesäiteg decidéiert fir dem Kontrakt een Enn ze setzen, hien de Risiko leeft, fir dem Händler eng Kompensatioun mussen ze bezuelen oder, wann eng Strofklausel am Kontrakt virgesinn ass, hien de Betrag vun där Strofklausel muss bezuelen. Den Händler huet d'Recht ze verlaangen, dass de Kontrakt erfëllt gëtt a kann de Keefer dozou zwéngen d’Gefier entgéint ze huelen.

Et ass och wichteg ze wëssen, dass de Code de la Consommation verlaangt, dass d'Präisser kloer, einfach ze liesen a verständlech affichéiert ginn. De Professionellen däerf kee méi een héije Präis froen, wéi dee Präis, deen och affichéiert ass. Dëst bedeit konkret :

• Beim Verkaf vun engem ausgestallten Auto ass de Professionellen un den affichéierte Präis gebonnen;
• Bei der Bestellung vun engem neien Auto ass de Professionellen un dee Präis gebonnen, deen am Kontrakt festgehale gouf. Hien kann de Präis net eesäiteg erhéijen. Dëst gëllt souwuel fir déi affichéiert Präisser am Showroom, wéi och fir d'Präisser am Kontrakt. De Präis muss och ëmmer de Betrag vun der TVA an allen aneren Taxe beinhalten an däerf keng eventuell staatlech Primme berücksichtegen;
• Falls eng Indexatiouns-Klausel am Kontrakt virgesinn ass, sou muss dës kloer a verständlech sinn an all d'Modalitéite vun der Berechnung am Detail beschriwwe sinn.

Sollt de Verkafspräis méi héich sinn, wéi de Präis deen affichéiert gouf, huet de Konsument d'Recht d'Annulatioun vum Kontrakt viru Geriicht anzekloen.

Leasings-Kontrakter

Opgepasst bei engem Leasing ouni „Obligation d’achat“, d.h. bei engem Kontrakt, an deem eng Persoun e Gefier fir eng bestëmmten Zäit least, meeschtens iwwert e puer Joer, ouni dass si d'Gefier um Enn vum Kontrakt kafe muss! E rezent Urteel vum Geriichtshaff vun der Europäescher Unioun huet bestätegt, dass e Konsument mat engem Leasingskontrakt ouni „Obligation d’achat“ kee Widderufsrecht huet ausser hie gouf net richteg iwwer seng Rechter a Pflichten informéiert.

Kontrakter fir ee Crédit à la consommation

Am Fall vu Kontrakter vun engem « Crédit à la consommation » huet de Konsument ee Widderufsrecht vu 14 Deeg. Dës Period ufänkt eréischt u mat lafen nodeems de Konsument komplett a korrekt Informatioun kritt huet.

Zustaanekomme vun engem Kontrakt 

Mam Ënnerschreiwe vun engem Bestellungsformular ass ee Kontrakt tëschent dem Konsument an dem Händler ofgeschloss. Dëst bedeit datt den Händler dat bestallt Gefier muss liwweren an de Keefer muss de Präis bezuelen, deen am Dokument spezifizéiert ass.

Zu gudder Lescht

Zesummegefaasst gëtt geroden ëmmer opmierksam ze sinn, sech déi néideg Zäit ze huele fir d'Konditiounen ze liesen an se och ze verstoen éier een ee Kontrakt ënnerschreift, dëst fir spéider Komplikatiounen ze vermeiden.